'Na vota nce steve 'nu marite e 'na mugliere; e tenevene 'nu muojo re terra. Dicette 'o marite, vicine 'a mugliere: "Che nce vulimmo semmenà?". Respunnette 'a mugliere: "Semmenammece lu paniche bufite, cu' trincule rite". Rispunnette 'o marite: "E vene la quaglia bufaglia, cu' trincule raglia, e sse mangia lu paniche bufite, cu' trincule rite". E rispunnette la mugliere: "Nuje nce facimmo 'na sepe bufete, cu' trincule rete; accussì, si vene la quaglia bufaglia, cu' trincule raglia, pe' sse mangia' lu paniche bufite, cu' trincule rite, nce acchiappe rinto". Venette la quaglia bufaglia, cu' trincule raglia, pe' sse mangia lu paniche bufite, cu' trincule rite; acchiappaje inte la sepe bufete, cu' trincule rete. E 'o marite e 'a mugliere 'mmetarono 'e pariente bufiente, cu' trincule riente.

(Trascrizione effettuata da Vittorio Imbriani, in Caivano, Napoli - 1875 ca.)